Me rastin e Ditës së Tokës, Këshilli Rinor u bë pjesë e dy aktiviteteve të ndryshme që kishin qëllim kryesor sensibilizimin e të rinjve për mbrojtjen e mjedisit dhe mënyrat se si mund të ndihmojmë në ruajtjen e tij.

Ditën e Hënë, më 22 Prill, me rastin e Ditës së Tokës, pjesëtarë të Këshillit Rinor së bashku me disa vullnetarë nga Outdoor Ambassadors dhe EcoVolis, u bashkuan në një marshim me bicikleta në Tiranë.
Gjatë marshimit u shpalosën dhe mesazhe sensibilizuese për mbrojtjen e mjedisit dhe u theksua rëndësia e përdorimit të mjeteve alternative të transportit, si mënyrë shumë efikase për reduktimin e emetimit të gazit karbonik në atmosferë dhe zvogëlimin e “gjurmës së karbonit” që secili prej nesh shkakton në mjedis.

Ndërkohë që ditën e shtunë, më 27 Prill, sërish anëtarë të Këshillit Rinor morën pjesë në një aksion vullnetar pastrimi në plazhin dhe pyllin e Darëzezës në Fier. Aksioni mblodhi bashkë disa organizata rinore dhe rreth 250 vullnetarë. Në përfundim të aksionit të pastrimit, pjesëmarrësit organizuan dhe një vizitë në qytetin antik të Apollonisë.

Gjatë pastrimit të pyllit të Darëzezës

Mbajtja e një mjedisi të pastër, të sigurtë dhe të jetueshëm për banorët është detyra e secilit prej nesh.

LEAVE A REPLY