Taboo Talks ju prezanton me diktatorin!
Taboo Talks, seria më e re e eventeve të Këshillit Rinor të Ambasadës Amerikane, erdhi sërish pranë të rinjve me eventin tone të dytë me një temë tepër të përfolur dhe njëkohësisht “tabu”: Diktatori.
I ftuari i vecantë për të zhvilluar diskutimin tonë të radhës ishte Erion Kristo, figurë e mirënjohur në shoqërinë civile, i famshëm për sinqeritetin dhe mënyrën e drejtëpërdrejtë që shpreh opinione. Me një të ftuar të tillë, diskutimet për periudhën e komunizmit nuk mund të bëheshin më interesante!
Eventi filloi ndryshe këtë herë, me një quiz të shkurtër për pjesëmarrësit tanë. Pyetjet caktuan pesë fituesit e librit “Metakomunikim dhe mediamorfozë” nga Artan Fuga, të ftuar në diskutimin tonë të mëparshëm për fenë.
Gjatë takimit u diskutua për ideologjinë komuniste, komunizmin në Shqipëri dhe impaktin që kjo periudhë ka në jetën tonë, edhe pse nuk e kemi përjetuar vetë. Erion Kristo na tregoi më tepër rreth eksperiencës së tij personale në periudhën e diktaturës, duke na ofruar gjithashtu paralelizimin e asaj periudhe me aktualitetin politik shqiptar.
Pjesëmarrësit ndanë pikëpamjet, opinionet duke sjellë qëndrime nga më të ndryshmet. Gjithashtu, nuk hezituan të bënin pyetje interesante, të cilat e bënë këtë diskutim akoma më produktiv dhe interaktiv. Duke i falenderuar të gjithë për pjesëmarrjen, ju mirëpresim në eventet e ardhshme të gatshëm për të diskutuar dhe për të kaluar një tjetër pasdite ndryshe!
